أنا المندسّ

انا المندس من صف الرابع

وقت طردوني من حصة الرسم لأني رسمت “ميكي ماوس” حامل شعار الحزب

بمناسبة الحركة التصحيحية

انا المندس من وقفة حاجز أمن بالتمانينات قبل حلب بشوي

شحطو فيه امي وابي برا السيارة كأنون مجرمين

وبعد ما فتشو السيارة قالو لأبي “انقلع

انا المندس من وقفة الدور على فرن الخبز

و”الطيارة” هلي اكلتها من واحد أمن

لأني قلتلوه “بالدور ابو الشباب لو سمحت

انا المندس من وقفة التربية العسكرية

هلي شعارها “وقف باستعداد يا حيوان انت وياه

انا المندس من الشعارات المدرسية

وخصوصاً “حط المي بالكاسة حافظ اسد الماسة

لحد هلأ مافهمت ليش بدي حط المي بالكاسة؟

انا المندس من صف بالمدرسة

فيه ابن مسؤل دخّل مرافقة ابوه على المدرسة

مشان يضربو الاستاذ هلي عاقبو قبل بيوم

انا المندس من تهديدات سمعتها من شوية شبيحة

لأنو في بنت حبتني كان حاببها ابن ضابط كبير

انا المندس من يوم فحص القبول بكلية الفنون سنة ١٩٩٤

وقت اجا لعندي عنصرين مرافقة جوا قاعة الامتحان امام المراقبين

وطلبو مني ارسم الرسمة لصبية معي بالقاعة بعد ما  خلّص رسمتي

طبعاً شكراً لألون

اجا يوم النتائج

انا اخدت علامة ٥٥

وهي اخدت ٧٥

لحد هلأ بتذكر عيونك الغبية

وحابب اني قول بكل صدق

انو مشكلتي مو معك

مشكلتي مع ابوكي

يا بنت الكلب

انا المندس من كلمة خاين انقالتي

من بنت متعلمة ودكتورة

سألتني “انت بتحب حافظ الاسد شي؟

جوابتا “لاء … المحبة من عند الله

فردت على كلامي “هلي ما بيحب حافظ الأسد بيكون ما بيحب سوريا، وهلي ما بيحب بلده بيكون خاين

انا المندس من مكتب ابي الهندسي

هلي في يوم اجيت فيه على المكتب

وشفت صورة حافظ الاسد معلقة فوق كرسي ابي

سئلته وانا عم خانق “شو انت فاتح مكتب هندسي ولا دائرة حكومية

غص ابي وجاوب “في شبين مابعرفون اجو لعندي وباركولي بالمكتب وقلولي انو الحيط فاضي وهيك مو منيح للشغل والرزقه

انا المندس من نفس المكتب سنة ٢٠٠١

هلي زاروه شبين غير هدوليك

وبلشو يحكو عن الاصلاح والتغير وانه لازم نغير

الصورة

هلي على الحيط

انا المندس من شفّة مفزورة على حاجز سوري بالبنان

وقفنا عليه بالسيارة انا ورفقاتي البنانية من الجامعة

و وقت طلعونا من السيارة مشان يفتشوها

تذكرت كيف طلعو امي وابي على حاجز التمانينات

وقلت للضابط “انا سوري وحابب قول انك وقت بتتعامل بهل الطريقة بتكون عم بتسيئ لبلدنا

انفزرت الشفّة

وشاف حضرته الهوية وضحك

كأنو البوكس هلي اكلته على حنكي كان مجرد مزحة

وقال “يازلمة فكرتك لبناني متنكر … هاها هاها هاها

ورافقه كورال من ضحك العساكر

واضاف … “فتاح الحاجز يا ولد … ومشي الشباب

انا المندس من ربيع دمشق هلي مالحقت شوفه

وقت أصدقائي الشيوعين بلشو يحكولي فيه عن منتديات المجتمع المدني

وعن الاستاذين الكبار عارف دليلة ورياض الترك

وكيف اني لازم احضر منتدياتون

وانها مجر منتديات و مو احزاب

بما اني برفوض الانتساب لأي حزب

و

اختفو الأصدقاء قبل ما احضر اي منتدى

وما عدت سمعت عنون شي

انا المندس من عائلة

بتتشكل من

ابي الشيوعي الملحد

امي السنية

حمايي العلوي

وحماتي المسيحية

وكلون بيسبّو على الفساد بنفس الطريقة

وهنن كلون من طبقة متوسطة ما فيها لا فقير ولا غني

ومافيها حدا انحبس او انقتل مشان رأي

انا المندس من ذاكرة سودا

معطّرة بريحة الياسمين من حارات الشام القديمة

ودخنة الاركيلة بالنوفرة

انا المندس

هلي عشت طول عمري ببلدي مندس

لأني كنت عايش غريب عن كتير شغلات فيه

متل أغلبية الشعب

المندس

انا المندس

هلي اليوم صوتي عم بيقول “حرية

مو مشاني

مشان ابني

هلي مابدي ياه يعيش متلي

مندس