مقام المنحبكجي

ما بيضرّكش أحيانا تشوف مقامك بعيون أحباب القلب يا قبّاري…
انت يللي عمتقرا هلقتي

هذاك الشب اللي رجع من فرع الأمن السياسي واللي كان مدعوم بواسطة ثقيلة من المشايخ (على ذمة الراوي من شيخ العقل ونازل…) بقي يومين حتى قدر يحكي.

أخذوه لأنو بعث بطانيات للإرهابيين المسلحين.
طلع من الفرع بعد أربعتيام مشلشل.

الحكي.. ولك حتى الحكي كان يوجعلو عظامو. وكان طاير من الفرحة لأنو بقي عايش. ومن بين الدعوسة على بطنو وراسو، وعصي الكهرباء والبزقات والمسبات لأمو وإختو… قدر يتذكر شوي من الحوار اللي دار بين رئيس الفرع وأبو حسين المامور

• قُللو يا أبو حسين لهالعرصة يقول للمشايخ اللي عما يتواسطولو إنهن زبالة، مو زبالة وبس، زبالة وخمّة تحت اجرينا. وكل يوم بيجي عرصة منهن لعنّا يفسفس خبريات، وعما نكشّهن عنا متل الذبان. ثمن أكبر راس فيهن فردة سباط مو جوز هه؛ فردة… قللو نحنا حتى ما نزعّل أهل السويدا راح نطلّعك عايش لحتى ترجع وتسلّملنا عالمشايخ تبعك
ــ هاي العصاية عمتقوللو سيدي…

• قللو كيف أهل السويدا عايشين، من وين رواتبهن ورزق أولادهن يا بو حسين؟
ــ من تحت صرمايتنا سيدي

•وكيف منحكمهم لأهل السويدا يا بو حسين؟
ــ بالحبلة سيدي

•هلق الصرماية بتصير فوق راسك انت يا بو حسين. كيف منحكمهم قلتللي؟
ــ بالرّسن سيدي بالرّسن

لكان بالرّسن…. !!
الدنيا مقامات… مش غلطان أبداً يا رئيس هالفرع… قال أمن سياسي قال..

شرح المفردات:
هلقتي: يعني الآن
صرماية هي. أتفه أنواع الأحذية.
الرسن: حبل يستخدم لتجويد الحيونات. وبعض أنواع البشر. يالي من صنف البهائم

الصورة: Boardman Robinson