الصفحة الرئيسية / نصوص / شعر / الوصايا العشر لشهيد تحت التعذيب.
فادي زيادة

الوصايا العشر لشهيد تحت التعذيب.

من روح البطل باسل جومر.. ولكل حر في سوريا..

——

 

بآخر دقايق والوقت
فيه الثواني سنين
كرج العمر كلو.. متل لمحة..
وصوت الوجع.. مكتوم
تعب الوجع مـِ الآخ
وانشقّت البحّة..

الوجوه سودا قاسية
والدم طرطشها.. فكّرتها حيطان
ما ضل فيها شي
بيشبه ملامح تشبه الإنسان..
ويا دوب نتفة ضو تحت العين..
ويا دوب باقي شي نفَس
والروح ع حدّ البدن.. ع اللي بقي من هالبدن
ع آخر البقيان..

قبل السفر للضو..
بآخر دقايق بالعتم..
آخر حكي..
آخر وصيا للحلم:
– اصحوا من النسيان
لا تتركوا شي اسم ما تقولوه
سمّوا الشوارع.. والمدارس
حتى ولاد الـ رح تجي
كل طفل ع اسم انقتل.. سمّوه

– خلوا المدى إلكن..
لا تحبسوا أرواحكن ع الأرض
وصلّوا لنسمة من الوطن
وتعمّدوا بتراب فيه الروح
وخلّوا المحبة.. فرض.

– لا تعملوا باسمي عزا
لا تلبسوا الأسود على مجدي
رشّوا الورد ع درب مدرستي
وجيبوا الصبايا يقعدوا حدّي
وعلّوا الأغاني للصبح..
وقولوا عن عيوني زجل
وكل ما تعب قوّال
رِدّوا افتحوا ردّة

– بالأرض كل الخير
لا تصدقوا كذب الهوى الغربي
خلوا مهر عرسانكن
قمح وعنب
زيتون أو شتلة قطن
ولا تدعسوا الغربة..

– ما في نسب بالدم
خيّك ابن عمك : ابن بلدك
يلي وقف كتفو على كتفك بوجه الظلم
يلّي هتف..
لولاد زاحوا الهم
ما في نسب.. إلا البلد
سوريا هي الأم..

– وصيّتكن العشاق..
هنّ الأمل..
هن الفرح.. وهنّ الـ بيردوني لحضن أمي
لا تتركوا الدنيا توجّعهن
لا تكسروا حلمي
وصيّتكن العشاق..
أصل العشق………. اسمي.

– بدي أغاني تنكتب
تحكي عن الأيام .. للأيام
تسرق أسامي كم بنت
حملوا الحلم بالشام
تحنّي أضافر طفل من درعا
لشباب من قلعة حلب
أقوى من القلعة
للجسر عند الدير
للصوت لـ عاصي حماة
لصرخة القاشوش والـ سِمعا
لحمص يلي خرمشت وجه السما
وقالت ما في رجعة
للبحر وولادو..
للرقة للغوطة
لكراد أقرب من عِرق عيني
بالضحكة والدمعة

– شفتوا الجرح يلي بقي مفتوح ع صدري
موجوع عم ينزف أسى
وع صوتكن بيطيب..
كرمال كل الـ راح
كرمال روحي بالسما ترتاح
لا يكون بين وجوهكن.. وجه الغريب..

– بدي العلم أخضر
يعلّي بكل ساحة
وتعود سوريا
نبراس للدنيا
وتهب ع كل المدى رياحا
بقلوبكن قبل الحجر
علّوا عمايرها
ومدّوا الفرح زينة
يبرم ع دايرها
وصِيدوا المجد.. مع كل طلعة ضو
وحطوه نقطة زيت
تضوي بمصباحا

– آخر وصية الدم
آخر وصية: الدم
آخر وصية: الدم..
لا تتركوا تاري
ولا تتركوا هالحلم
وتذكروا
هالليل ما بيطول
والحق هو النجم..
بعدو.. شمس تعلا والضو حريّة
والسوري أول اسم..

….
ع مهل عم ارتاح..
ما عدت محبوس بجسم
ضل الحبس والعتم للسجان
وطلِعت مع نسمة ورا القضبان
اسرح بسوريا..
اعشق .. نبض القلوب
صبّح على الانسان….

 

 

 

الصورة: فادي زيادة ©

عن دحنون

دحنون
منصة تشاركية تعنى بالكتابة والفنون البصرية والناس.

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.