شهادات من يبرود

شهادة امرأة من قارة 
المرأة الأميّة والفقيرة التي لم تعرف أين تفرّ بأولادها حين حرقوا بيتها، فأتى بها أولاد الحلال إلي السويداء: تقول بالحرف:
– إي نعم عنا تركت أهل قارة 80% منهن مؤيدين. بس ليش مؤيدين؟ لأنو كان كلما يدخل الجيش الحر عالمدينة يبلش علينا القصف، والناس تموت والعمار يتهدّم… قاموا قالولهن منشان الله اطلعوا واتركونا بخير. كل القصف علينا من تحت راسكم… وبعثوا من عنا ناس تقول للجيش نحنا معكن… قام انسحب الجيش الحر ودخل الجيش الوطني… ومن الصبح للمسا نهب الجيش أكثر من 200 بيت من بيوت قارة الحلوة… نهبوا كل شي حتى حنفيّات الميّ والناس عم تتفرّج ومانها قادرة تعمل شي,| أنا كنت متخبية عند جيراني وشفت كل شي. بعد السرقة فخّخوا هالبيوت كلها لحتى صارت عالتراب! بحطوا قنبلة بتنزل البيت مثل الطحين على الأرض وما بظلّ معلّق غير شبك الحديد هيك مثل الفزّاعة… ولمين هالبيوت؟ كانت كلها للناس اللي طلعت من سنتين بالمظاهرات… طيب ليش ما كانوا يتركوا هالبيوت ويصادروها من أصحابها ويعطوها لحدا فقير؟ والله تعب الناس مو لعبة وهاي نعمة الله حرام نحرقها…

شهادة صبية مسيحية من يبرود: 
سكان يبرود سنة ومسيحيين، عايشين من يوم يومن سوى. صار لنا من سنة ونص تحت إدارة الجيش الحر. وما حدا مننا نحنا المسيحيين آذوه أو أساؤوا معاملتو. وفي منا ممثلين بالمجلس البلدي وإلهن كلمتن… على دور الجيش الحر صارت يبرود نظيفة ومنظّمة وفيها مجلس بلدي من الجيش وأهل البلد، وكنا كثير مرتاحين لإدارتن، والمدارس شغّالة… كانت عم توصلهن تبرعات من برّا وعم يوزّعوا رواتب للموظفين. هي صح رواتب قليلة لكن ماشي الحال… من شهر بلّشت علينا البراميل ويبعثولنا: جاييكن حزب الله وجايب دبابات وصواريخ بتدمّر دولة… وصاروا يبعثوا ناس وسخة من أهل البلد تعمل مشاكل أكثر شي بحارة الصالحية هاي اللي فيها سنة ومسيحيين بنفس الحيّ… هاي أكثر حارة نزل عليها براميل… وكل أهلها طلعوا منها…أكثرهن على لبنان… أنا هلق رجعت لعند أهلي عالسويداء، وزوجي صار بلبنان وأهلو بالشام… يعني صرنا كل مين بديرة…
لكن أكثر حدا راحلو قتلى هو حزب الله، جنودو هني اللي هجموا عالبلد وما يلاقوا إلا شباب يبرود مع الجيش الحر طلعوا بوجهن بكل شي معهن سلاح… ما حدا توقّع إنهن يصمدوا شهر، صمدوا قد ما فيهن لكن ما إجاهن دعم أبداً… وهلق بعد ما فرغت يبرود من أهلها عميسرقوا كل شي، معامل يبرود كلها: كل يوم القاطرة ومقطورة بالعشرات عمتقلع المعامل من أرضها وتاخذها ما حدا بيعرف لوين…