نزلة برد

مرّن ثلاث سنين.
والحجي مو راجع من الحقلة بحليب
والحجة ما تاكل مثل هالناس
وولاد حسنة ال كانم يبيعوا التتن
باعوا الزرايب للحريق

والناس وقعت بالقبر
مثل الدّحاحل

والصبح مو باين
مثل قناص فوق الزبلطاني.

والميّة محمرّة بنهر تورا.

…

مرّن ثلاث سنين
وسقوف زربت بالمطر
حبّة ورا حبّة

دستة حمايم طارن من الجرد
وهدّن على القبة

والصوت علقان بشوارعنا
مثل ندبة

الشمس حميانة على النافوخ
وكل الشماسي قبالها مقروفة الرقبة.

…

خيفانة من طلّتكم بليّا سبب
ومن بعد هالجيّة.

مدري تجون اثنين
وتروحون ميّة

دفيانة لسا المصطبة
ال كنتم عليها.

والمطر
نازل ع سقف التوتيا.
مثل البحص.
والعث عم ياكِل خشبنا.

لسا القشب يبسان فوق ايديّ.
دهن القشب مغشوش.

ومر الهوا
وسكّر عليّ الباب..
باب الحوش.

وحفيانة.
تحتي الأرض كسّرها السقيع.

والبرد نازل عالعظم
مثلمّا ينزل عالعظم شاكوش.

…

الشمس ضربت عالقزاز
وقّف مطر كانون قبل شوي.
والميّة نامت بالحُفر

الشمس ضربت عالخشب.
– كان الخشب مبلول –
وشافت صبية مكمكرة بهدومها
عم تمشي ع سواة الرصيف
واللفحة دفيانة بنفسها
والغيم خبى شوية من ضوّ الشمس عالحيط

ريحة رمل رطبان.
والشمس ضربت عالعماير و البيوت

والهوا طير و ضرير
والميّة عم تزحف قبل ما تموت

اللفحة دفيت بالنفَس
والبرد عم يكسر عظم بيروت

…

عَمّال نلعب يا شمس
عدينا للعشرة و طبشنا العد
بالطميمة.
و شبعنا ركض و دوار
يا شمس
يا شموسة
وين راحو الولاد؟

عمال نلعب يا عتم
حلوة الدواير بالسِّيَفْ و النار
يا عتمة
ما كان العشم تمشين
و نشوف عالإيدين
تعليم الحرق
غبرة
وسقيع

وركاض بعد ركاض
ووقوف بعد وقيع
وحجار
سبع حجار
جمب الحيط
وقعانات

و الناس عم تهرب

…