نوّار

كمشة حبق بالإيد
وعصفور ع الشَعرة
وخصرِك ع باب الضو
خيالات عم تِركض
تِقلّي قبل ما تغيب وتبعِّد
لا تخاف من بكرة
نوار يا عصفور
متل الصبح ترتيب من الله
كل ما فرَك بالعين خيط النور
وبفيق مستعجل
وبقول ما شا الله
بتتزحلق الكلمة متل ميّة على البلور
بحبك يـَ بنت الشمس
بحبك أنا… والله
جنّة ولعب بالنار يا نوار
لو تكبري قبالي
الصغار صاروا كبار
حالن سبق حالي
عم فرفط الساعات
تعبان وجه السما
ومجروح خدّ الريح
حاسس بصدري رمح
بشهق صبح
حتّى يهدّيني التعب
يا بشيلو يا بيزيحو
صلّي لتبقي عِمر
خيالك على خيالي
وغنيكي مع فيروز”
برج الحمام مسور وعالي”
يمكن إذا بشوفِك
هالمرّة بحكي أنا
عم تفهمي عليّ؟!
هالمرّة بحكي أنا
بحاكيكِ عن شَعرِكْ
كيفْ لفّني بالليل
بحاكيكِ عن شفتِك
قصّة عسل مخمور
قهوة ع غيمة هيل
ونبيد
مع كل عضّة شِعر
بتقطر هوى وبتزيد
بحاكيك عن إيدك..
طفل
كربوج عم يلعب
بحاكيك عن خصرك ع باب الضّو
بحاكيك عن عطرك أمير الجّو
بحاكيك عن كلّك يا بنت الشمس
عن نار عم تغلي بدمّي النار
شو صار يا نوا
وشو طالت الأيام
شو صعب اشتقلك
وكتير مشتقلك
وما بعانقك وبوسِك
إلا بعد ما نام
مسكينة هالأحلام
يمكن عزا المسجون
ومخدتو .. الأحلام….

الصورة: عمران يونس